د افغانستان د نیواک کلیږی په مناسبت د «همبستګۍ ګوند» اعتراضي غونډه
- کټګوري : گزارشونه
- لیکونکی: د افغانستان همبستګۍ ګوند
- نیټه: شنبه, 15 تله 1396
کابل – د ۱۳۹۶ کال د تلې ۱۴مه: نن د همبستګۍ ګوند یو شمیر غړي او پلویان د امریکا له لوری د افغانستان نیولو ۱۶مې کلیږي غندولو په موخه د «امریکا، ناتو او د هغو د لاسپوڅو په شتون کی، سوله او نیکمرغي ناشونی ده!» تر شعار لانده یوه اعتراضی غونډه لرله. د غونډې ګډونوالو له ځانه د امریکا او ناتو د هوایی بریدونو د قربانیانو انځورونه له ځانه سره چی پکی دا شعارونه هم په سترګو کیدل: «امریکایی هډې= د مریتوب او سپکاوی زنځیر منل!»، «د امریکا او ناتو ډالۍ: د بیګناه وګړو وژنه او چړاو!»، «یوازی د نیواکګرو او د هغوی مریانو په شړلو سره دموکراسۍ او سوکالۍ ته رسیدلی شو!»، «په یووالي او پاڅون سره کولای شو پر نیواکګرو او د هغوی پر چوپړانو بریالي شو!»، «آزاد افغانستان د نیواکګرو او د هغوی وطنی ملاتړو په شړلو سره انځوریدلی شی او بس!».
آغلې سیلۍ غفار، د ګوند ویاندې په خپلو خبرو کی وویل:
«زمونږ د هیواد په نیولو سره، د افغانستان خلکو رنځ نور هم زیات شو: کلي او بانډې مو هره ورځ د امریکا او ناتو وینیبهونکیو ځواکونو له لوری بمباریږي او ډیری قربانیان یی ښځې او ماشومان دی؛ کلیوال د طالب او داعش او اربکی ترمنځ ځپل کیږي؛ ښاریان د طالبی او داعشی خنزیرانو په چاودنو او ځانوژنو کی ټوټه – ټوټه کیږي؛ ټوپکسالاره موږکان یی په داړونکو لیوانو بدل کړل او زمونږ په برخلیک یی واکمن کړل او په وروستۍ پیښه کی د «کابل قصاب» په نخرو او مکیز هرکلی وشو او د نورو ځناورو ترڅنګ و ټومبل شو؛ مذهبی توپیر ته منظمه توګه لمن وهل کیږی چی لومړني قربانیان یی زمونږ بیګناه هیوادوال دي؛ زمونږ خاوره د سیمې او نړۍ د جګړې او سیالیو په ډګر بدله شوی چی هره ګړی له ستر ګواښ سره مخ ده؛ د ایران او پاکستان کرغیړن لاسونه تر وروستۍ کچې زمونږ په هیواد کی پرانستی پریښودل شوی او زمونږ خاوره د هغوی د څارګرو بنسټونو په ځاله بدله شوی ده؛ د مخدره توکو تولید او قاچاق ددغه هیواد د اقتصاد اصلی سرچینه ګرځیدلی او درې میلیونه روږدي د هغې پایله ده؛ زمونږ بدمرغه ښځې د تیر په څیر په سوځونکی دوزخ کی کباب کیږي؛ فساد او چټلی او خیانت په دغه چوپړ دولت کی داسی ریښې ځغلولی چی له هغی څخه خلاصون څو لسیزو ځانوژونکی کار ته اړتیا لری او په زرګونو نور مصیبتونه او ناورینونه.»
د غونډې په پای کی، د همبستګۍ ګوند د ځوانانو د تیاتر ډلې د امریکا او د هغې کورنیو چوپړانو تر سیوری لاندی د هیواد ناوړه وضعیت نندارې ته وړاندی کړ.
