د افغانستان او فلسطین غزه په وینه او اور کی ډوبه، ستمکونکي په چړچو او لوټ کی مست!
- کټګوري : اعلامیی
- لیکونکی: د افغانستان د همبستګۍ ګوند
- نیټه: سه شنبه, 31 چنگاښ 1393
د افغانستان او فلسطین په هر ګوټ کی د بیدفاع وګړو وینه بهیږی او مونږ هره ورځ ددغو زړهبوږنونکو پیښو شاهد یو. پرته له شک څخه د هر ناورین او ویجاړۍ ترشا، سړي خوړونکی نیواکګر شتون لری او د جګړې په اور لګولو سره خپل کرغیړن ژوند پر مخ بیایی. په دی منځ کی د طالبی او صهیونیستی ټولوژنو پر وړاندی نه یوازی په اصطلاح آزادې نړۍ چوپتیا غوره کړی بلکه په پټه توګه سړيوژونکو ته وسله او امکانات هم ورکوي.
د افغانستان غزه او د فلسطین غزه له کلونو راپدیخوا د لویدیځو او سیمیزو ځواکونو د توطئو او دسیسو ښکار ده. مونږ د نړۍ د خلکو پر ویښو وجدانونو غږ کوو چی ددغه ښکاره فاشیزم او ځناورتوب پر وړاندی چی نړۍ د شډلتوب خواته بیایی را ولاړ شي کنه ډیر زر به دغه ویره هغوی هم په خپله لمنه کی راونغاړي.
د ارګون زړهبوږنونکی پیښه چی اوسیدونکو یی خپل هرڅه له لاسه ورکړل، هغه وخت رامنځ ته شوه چی د دولت فاسد چارواکی په راتلونکی دولت کی د څوکی تر لاسه کولو لپاره په معاملو کی بوخت وو او د خلکو امنیت یی هیر کړی وو. له بل پلوه په پارلمان کی ناستو خلکو هم د خپلو جنایتکارانو ورنو په څیر ډګر تش لیدلی وو، پرته له دی چی د خلکو بدمرغۍ او ویر په پام کی ونیسی د خپل راتلونکی د هوساینی په خاطر یی په ډیره بیشرمۍ سره د وکیلانو د امتیازاتو قانون تصویب کړو.
د طالبانو وینهتویهونکی او ناپوهه ډلې د نړۍ د څارګرو ډلو په اشاره او د پاکستان دولت په مرسته خپلو چادنو، ځانوژنو، بم ایښودنی او پر ملکی ځایونو بریدونو ته زور ورکړې او خپلو کرغیړنو موخو ته د رسیدو لپاره زمونږ بیګناه خلک وژني. هغوی چی په بیشرمۍ سره «د کفارو پر وړاندی جهاد» ناری وهی، ولی په عمل کی له امریکایی «کفارو» سره زړه او ځیګر دی او د نیواکګرو د کرغیړنو سیاستونو پلی کولو لپاره منډی ترړی وهي.
په هلمند، قندهار، نورستان، بدخشان، ارګون... کی په زرګونه هیوادوالو شهادت، ټپي کیدل او کډه کیدل د بیوزلۍ او نورو ګواښونو ترڅنګ ددی واقعیت څرګندونه کوی چی د ملت دښمنان ددی هیواد لوټلو او ویجاړۍ لپاره د امریکایی نیواکګر په مرسته یو بل ته لاس په لاس کی ورکړی ترڅو په نږدې راتلونکی کی د ټولو جنایتکارانو او لوټمارانو په یوځای کولو سره یو بویناک دولت رامنځ ته کړی، ترڅو زمونږ د خلکو برخلیک یو وار بیا د ویجاړۍ خواته بوځي.
د «افغانستان همبستګۍ ګوند» د ارګون او د فلسطین مبارز ولس کورنیو ته د زړه له کومې تسلیت وای، او د طالبانو ځناور بریدونه او پر غزه د اسراییلو فاشیزم په کلکو ټکو غندي. مونږ قوی باور لرو چی نه په اوښکو تویولو او کرکه، بلکه یوازې او یوازې د ستمکونکو پر وړاندی د ولسونو په راپورته کیدلو چی له هر جنس څخه وی، کولای شو دغه تورې ورځې او کرغیړن داغونه د بشریت له لمنې لرې کړو او آزادۍ ته ورسیږو.
مونږ په دی باور یو چی ترڅو د ټولو یرغلګرو، او د هغوی وطنی ملاتړو او نورو نیواکګرو لاس زمونږ د محرومو وکړو له ستوني لنډ نشی او د خلکو تر ارادې لاندی ملی-دموکراتیک دولتونه منځ ته رانشی، ځپل شوی ولسونه به د سولې او هوساینی مخ ونه ویني او جنایتونه به په همدی څیر دوام ومومی. له همدی مخې مونږ په ټولو ولسی بنسټونو، آزادۍغوښتونکو شخصیتونو او پرمختللی ګوندنو غږ کوو چی د جنایت او جنایتکارانو پر وړاندی چوپتیا ماته کړی او د محرومو ملتونو د رهبري کولو او پوهاوی لپاره لکه یو موټی یوځای شي.
د افغانستان د همبستګۍ ګوند
د ۱۳۹۳ کال د زمری ۱ نیټه - (۲۰۱۴ کال د جولای ۲۳ نیټه)
