د غویی اوومې او اتمې د غندلو په موخه د «همبستګې ګوند» غونډه
- کټګوري : گزارشونه
- لیکونکی: د افغانستان د همبستګۍ ګوند
- نیټه: پنج شنبه, 06 غویی 1397
کابل – ۱۳۹۷ کال د غویی ۶مه: نن د همبستګۍ ګوند غړو او پلویانو د غویی ۷مې او ۸مې تورو ورځو غندلو په موخه غونډه وکړه. مونږ داسی هوډ درلو چی پروګرام د لاریون په څیر د کابل په یوه جګړهځپلې سیمه کی لکه جاده یا زوړ ښار کی په لاره واچوو، خو دولت په هغه ځایونو کی د نیولو اجازه رانکړه او ګوند یو وار بیا د ښار په یو بند ځای کی راګیر شو.
د غونډې ګډونوالو له ځانه سره پلاکارتونه لرل چی د کابل د ویجاړیو د څلور لسیزو په ځانګړې توګه او غویی اتمې قربانیانو انځورونه په کی له دې شعارونو سره ول: «د غویی اوومه او اتمه، د ملی ویر دوه ورځې دي!»، «زمونږ خلک با د غويي اوومې او اتمې جنایتکاران محاکمه کړي!» «د غویی اوومې او اتمې جنایتکارانو له محاکمې پرته، افغانستان سولې او نیکمرغۍ ته نشی رسیدلی!»
آغلې سیلۍ غفار، د «افغانستان همبستګۍ ګوند» ویاندې په پیل کی وویل:
«د غویی ۷مه په هیواد کی جنایتونو او هیوادپلورنې پیل وو چی په میلیونونو مړي، ټپیان او در په دره انسان یی پر ځای پریښودل. په خواشینۍ سره چی د افغانستان لوټماران او وژونکی چی زمونږ ویرجن ولس یی وواژه، نن د امریکا تر بیرغ لاندی د انسانوژنې او خیانت او لوټ په دوهم پړاو کی بوخت دي. دوی یو بل په غیږه کی نیسي او د افغانستان د خلکو پر وینو او جسدونو په کړس خاندي. امریکا او لویدیځ هم پر همدوی پانګونه کوی او پوهیږي چی همدغه جنایتکاران حاضر دی چی د څو پيسو په بدل کی له هیواد او ناموس څخه تیریږي.»
د خپلو خبرو په لړ کی د نوملیکنې په مرکز برید کی د قربانیانو کورنیو ته په ډاډورکولو سره، زیاته یی کړه:
«په اوسنیو حالاتو کې تر هغې چی ولس د ملی خاینانو او د هغو بهرنیو بادارانو پر وړاندې په پاڅون او مبارزه لاس پوری نکړي، که ټاکنې ترسره شی او که نه، همدغه هیوادپلورونکی ناتارکونکی، ټوپکسالاران، هیرویینسالاران او څوتنه چټليخوړونکی روڼآندی به د بهرنیو نیواکګرو په مټ زمونږ پر برخلیک واکمن وی. د ۲۰۱۴ له ملنډو ډکو ټاکنو هیڅ شي ته د ولس په ګټه بدلون ورنکړ، یوازی یی طالبی او داعشی انسانوژونکو ته زمینه برابره کړه چی په دې پلمه پرلپسې زمونږ په بیګناه خلکو بریدونه کوی او ډلې ډلې وژني. له همدې موقعې څخه په ګټه اخیستنې د برچې دښتې د پیښې قربانیانو کورنیو ته ډاډګیرنه ورکوم. وګورئ هیوادوالو! دوی څومره بیشرمه او خلک زوروي. تر پرونه پورې چی زمونږ خلک د یوې پیژندپاڼۍ اخیستلو لپاره په اونیو د دولتی ادارو شاته سرګردانه ول، خو نن چی دوی پیژندپاڼو او د خلکو رای ته اړتیا لری، ګورو چی څرنګه یی د پیژندپاڼو مرکزونه پرانیستي او خلک هڅوي.»
سربیره پردې، د غونډې په یوه برخه کی، یو شمیر ځوانان د غویی اوومې او اتمې جنایتکارانو څیرو سره چی تر نن ورځې د خلکو په ټپي بډوډو سپاره دي، لیدل کیدل چی لاسونه یی په ځنځیرونه تړل شوی او ولسي محکمه کی ولاړ ول.
